ဝေဖန်ထောက်ပြအာရက္ခ

                  ဝေဖန်ထောက်ပြအာရက္ခ
     လူ့ပတ်ဝန်းကျင်တွင်လူရို့သည်တစ်ယောက်နဲ့တစ်ယောက်၊တစ်မိသားစုနဲ့တစ်မိသားစု၊တစ်အုပ်စုနဲ့တစ်အုပ်စု၊လူမျိုးတစ်မျိုးနဲ့တစ်မျိုးစသည်ဖြင့်ကူးလူးဆက်ဆံနီကတ်ရသည်။ယင်းပိုင်ဆက်ဆံနီရစွာမှာတစ်ယောက်ကိုတစ်ယောက်မိတ္တာနဲ့ဖြစ်ဖြစ်၊မနာလိုလို့ဖြစ်ဖြစ်အပြုသဘောဝေဖန်မှုတိအပျက်သဘောဝေဖန်မှုတိရှိတတ်ကြသည်။ဒေပိုင်ဝေဖန်ခြင်းသည်ပင်လူ့အဖွဲ့အစည်းတစ်ခု၏လုပ်ရပ်၊ဖြစ်စဉ်ဟုဆိုကြရပါမည်။
      အဂုတလောရခိုင်လူငယ်တိရေအိန္ဒိယရုပ်ရှင်ကားတိကိုစိတ်ဝင်တစားကြည့်နီကတ်စော်ကိုတွိမြင်နီရသည်။ကောင်းရေလို့မဆိုနိုင်ရေပိုင်မကောင်းလို့လည်းပြောလို့မရနိုင်ပါ။အိန္ဒိယနိုင်ငံ၏ဒီမိုကရေစီပွင့်လင်းမှုတိကိုရခိုင်လူငယ်တိရေအိန္ဒိယရုပ်ရှင်ကတစ်ဆင့်ခံစားနိုင်ကတ်တေလို့ဆိုရပါမည်။အိန္ဒိယရုပ်ရှင်တိရေအများအားဖြင့်ရည်ရွယ်ချက်ရှိရှိနဲ့ရိုက်ကတ်တေလို့လည်းတွိမြင်နိုင်ပါသည်။ဌာနဆိုင်ရာလာဘ်စားမှုတိ၊အားကစားဆိုင်ရာနိမ့်ကျမှုတိ၊ဘာသာရေးဆိုင်ရာလိုအပ်ချက်တိ၊ပညာရေးဆိုင်ရာပြုပြင်ပြောင်းလဲရေးတိကိုအဓိကထားပြီးကေရုပ်ရှင်ကတစ်ဆင့်ထောက်ပြကတ်တေလို့ဆိုရမည်။
        အိန္ဒိယရုပ်ရှင်ကားထဲကဌာနဆိုင်ရာလာဘ်စားမှုတိဆိုကေရဲဌာန၊ဝန်ကြီးတိလာဘ်စားစော်တိကိုအဓိကပစ်မှတ်ထားရိုက်ကူးကတ်ပါသည်။လာဘ်စားသောရဲ၊အာဏာကိုအလွဲသုံးစားလုပ်သောဝန်ကြီး၊ရွေးကောက်ပွဲဝင်ဖို့အတွက်မသာမာရေနည်းလမ်းတိကိုသုံးရေအမတ်စရေဇာတ်ကောင်တိကိုရိုက်ကူးကတ်ပါသည်။အားကစားဖက်မှာဆိုကေလေ့နိုင်ငံတော်၏အလေးမထားမှုအကြောင်းတိကိုတွိမြင်ရပါသည်။လူငယ်တိရေအားကစားဖက်မှာကြိုးစားချင်ကေလေ့လေ့ကျင့်ဖို့ကွင်းမရှိခြင်း၊ထောက်ပံ့ပီးဖို့အဖွဲ့အစည်းမရှိခြင်း၊နိုင်ငံတော်အားကာအဖွဲ့ကလေ့အလေးမထားခြင်းတိကိုတင်ပြကတ်ပါသည်။ဘာသာရေးဖက်ကဆိုကေအိန္ဒိယ၏ဘာသာပေါင်းမြောက်များစွာ၏ဟာကွက်တိကိုထောက်ပြနိုင်ကတ်ပါသည်။ပညာရေးဖက်မှာဆိုကေဝါ။အိန္ဒိယ၏ပညာရေးတစ်ခုလုံးကိုတောင်မဟုတ်ဘဲတစ်ကမ္ဘာလုံး၏ပညာရေးစနစ်ကိုတောင်ထောက်ပြလားရေသရီးအိုင်ဒေါ့ဇာတ်ကားဆိုကေလူတိုင်းသိပါသည်။
      အိန္ဒိယနိင်ငံသည်ကျွန်တော်ရို့နိုင်ငံနဲ့အိမ်နီးနားချင်းနိုင်ငံတစ်ခုဖြစ်ပါသည်။အိန္ဒိယသည်အိန္ဒိယရုပ်ရှင်ကနီပြီးကေမိမိရို့နိုင်ငံကိုတစ်ခုချင်းထောက်ပြနီရေလို့ဆိုရပါမည်။စာပီဖက်ကလေ့အိန္ဒိယသတင်းစာ၊ဂျာနယ်တိကိုဖတ်ကြည့်ကေသိနိုင်ပါသည်။ဒေပိုင်ရုပ်ရှင်ဖက်ကဖြစ်ဖြစ်၊စာပီဖက်ကဖြစ်ဖြစ်မိမိနိုင်ငံ၊မိမိလူမျိုးကိုထောက်ပြခြင်းသည်အမျိုးချစ်သောနိုင်ငံချစ်သောစိတ်ဓာကြောင့်ဆိုကေမှားဖို့မထင်ပါ။
     ကျွန်တော်ရို့ရခိုင်လူမျိုးရေအမျိုးသီလနှစ်ဌာနကိုစောင့်စွမ်းကတ်ကေမျိုးချစ်လူမျိုးတစ်မျိုးအဖြစ်မြန်မာ့အလယ်၊ကမ္ဘာ့အလယ်မှာရပ်တည်နီကတ်ပါသည်။မိမိကိုယ်ကိုလေ့အမျိုးချစ်ပုဂ္ဂိုလ်လို့ခံယူထားကတ်ပါသည်။မှန်ကန်သောခံယူချက်ဟုဆိုရမည်။သို့သော်အမျိုးချစ်စော်ကိုမျိုးချစ်စိတ်နဲ့ထပ်ဆင့်မျိုးချစ်ကြည့်ကတ်ပါမည်။
      မိဘရို့သည်သားသမီးရို့၏ကောင်းကျိုးကိုသာလိုလားကတ်ရေပိုင်ချစ်သောသူသည်ချစ်သူ၏ကောင်းကျိုးကိုသာလိုလားကြသည်။ယင်းနဲ့အတူအမျိုးချစ်သောရခိုင်သူရခိုင်သားတို့သည်လည်းရခိုင်သူရခိုင်သားတို့၏ကောင်းကျိုးကိုသာလိုလားကြမည်ဖြစ်ပါသည်။
      ကျွန်တော်ရို့ရခိုင်မှာရုပ်ရှင်၊ဗွီဒီယိုထုတ်လုပ်မှုကအားနည်းပါသည်။ယေကေလေ့စာပီဖက်တော့ခါအားမနည်းပါလို့ဆိုချင်ပါသည်။လစဉ်ထုတ်ဂျာနယ်၊နှစ်စဉ်ထုတ်မဂ္ဂဇင်းတိရှိပါသည်။အဂုဆိုကေမြန်မာ့အလင်းသတင်းစာမှာတောင်ရခိုင်ဂဏ္ဍတစ်ရပ်ပါနီပါသည်။ရခိုင်စာရီးဆရာတိကလေ့ယင်းစာစောင်တိမှာရခိုင်ရို့၏လိုအပ်ချက်၊ရခိုင်ရို့၏အနာဂတ်တိကိုအတွေးကောင်းကောင်းနဲ့ရွီးနီကတ်ပါသည်။အားရကျေနပ်စရာဖြစ်ပါသည်။ရခိုင်တစ်မျိုးသားလုံး၏လိုအပ်ချက်သည်အရေးကြီးသောတန်ပြန်တိုက်စစ်တစ်ခုဖြစ်တေပိုင်ရခိုင်ပြည်ထဲမှာရှိရေဌာနဆိုင်ရာတစ်ခုချင်းစီ၏လုပ်ရပ်တိကိုလေ့တန်ပြန်တိုက်စစ်တစ်ခုအနီနဲ့အသုံးပြုသင့်ပါသည်။
      စစ်တုရင်ကစပ်တေခါဘုရင်ကိုချတ်စ်ဖို့တစ်ခုတည်းကိုကြည့်လို့မရနိုင်ပါ။ပင်းသီး၊မြင်း၊ဘီချော၊ကာစတင်၊ဘုရင်မရို့ကိုဟန်ချက်ညီညီအလုပ်လုပ်ဖို့လိုအပ်ပါသည်။ဘောလုံးသဘောနဲ့ပြောရဖို့ဆိုကေဂိုးရဖို့အတွက်တိုက်စစ်တစ်ခုတည်းကိုသာအားထားလို့မရပါ။အားကစားသမားတစ်ဦးချင်းစီ၏ဟန်ချက်ကိုလေ့အရေးစိုက်ရပါမည်။
     ရခိုင်မှာအဂုဖြစ်ခရေဘင်္ဂလီကုလားပြသာနာစော်အယင်ခေါက်ပင်ဌာနဆိုင်ရာအလိုက်တစ်ခုချင်းထောက်ပြမှုမရှိခလို့ဖြစ်ပါသည်။ယင်းအချိန်ကရာထောက်ပြနိုင်၊ဝေဖန်ပြနိုင်ခဖို့ဆိုကေဒေလောက်ပြသနာကြီးလီဖို့မထင်ပါ။ကျွန်နော်ရို့ရခိုင်မှာအုပ်ချုပ်ရေး၊တရားစီရင်ရေးစရေဂဏ္ဍတိကိုဝေဖန်ထောက်ပြနိုင်ဖို့လိုပါသည်။ဌာနတစ်ခုချင်းအလိုက်ဝေဖန်ထောက်ပြနိုင်ရပါမည်။စာပီများတွင်တစ်ခါတစ်လီတော့ခါပညာရေးဌာနကိုဝေဖန်ထောက်ပြလို့မြင်ရပါ၏။အခြားဌာနတိဖြစ်သောထွေအုပ်၊လဝက၊ကျန်းမာရေး၊ရဲစရေဌာနတိကိုဝေဖန်ထောက်ပြလို့မတွိသိမ့်ပါ။အဂုဝေဖန်ထောက်ပြခြင်းသည်နောင်ကောင်းကျိုးအတွက်ဖြစ်ပါသည်။
         အိန္ဒိယရုပ်ရှင်တိမှာတော့ခါဌာနဆိုင်ရာတိကိုဝေဖန်ထောက်ပြသောစာရီးဆရာကိုယင်းဌာနကအရာရှိကနှိပ်ကွပ်ပြီးကေလုပ်ကြံသတ်ဖြတ်တေအထိမြင်ရပါသည်။ပြည်သူဖက်ကမားမားမတ်မတ်ရပ်ပီးရေသတင်းစာဆရာ၊စာရီးဆရာတိရေအသက်ပီးကတ်ရရေလို့မြင်တွိရပါသည်။ကျွန်တော်ရို့နိုင်ငံမှာလေ့လက်တွိမြင်ဖူးခကတ်ပါသည်။ယေကေလေ့ကျွန်တော်ရို့သည်ရှိဆက်ရပါမည်။နိုင်ငံကိုတိုးတက်စီချင်သော၊အမျိုးကိုချစ်သောသူတို့သည်နိုင်ငံတိုးတက်ရေး၊အမျိုးသားတိုးတက်ရေးကိုသာလုပ်ဆောင်ပါလိမ့်မည်။
      တစ်ခါရခိုင်ရို့သည်ဝေဖန်ရေးနဲ့အသားမကျနိုင်သိမ့်လို့ဆိုရပါမည်။ဝေဖန်ထောက်ပြလျင်ပင်မနာလိုလို့အပျက်သဘောဝေဖန်သည်ဟုမြင်တတ်ကြပါသည်။ဥပမာအားဖြင့်စာရွီးဆရာတစ်ယောက်ရွီးထားသောဝတ္ထုတစ်ပုဒ်စာတစ်ပုဒ်ကိုနောက်တစ်ယောက်ကဝေဖန်ထောက်ပြလျင်စာရွီးသူကဝေဖန်ထောက်ပြသူကိုမာန်ပါတတ်ကြပါသည်။အမှန်ကမိမိကိုဝေဖန်ထောက်ပြသူသည်မိမိကိုစိတ်ဝင်စားသောကြောင့်သာဖြစ်သည်။ယင်းနဲ့အတူမိမိစာ၊ကဗျာ၊ဝတ္ထုကိုဝေဖန်ထောက်ပြသူသည်မိမိ၏စာ၊ကဗျာ၊ဝတ္ထုကိုအသေးစိတ်ဖတ်ရှုထားသောမိမိပရိတ်သတ်ပင်ဖြစ်ပါသည်။
       ဝေဖန်ထောက်ပြတတ်သောအကျင့်၊ဝေဖန်ခံနိုင်သောအကျင့်သည်အဆင့်အတန်းမြင့်သောလူ့အဖွဲ့အစည်းတွင်သာရှိသည်။လူ့အဖွဲ့အစည်းတစ်ရပ်၏ဖြစ်စဉ်တွင်ဝေဖန်ထောက်ပြသောမဏ္ဍိုင်သည်အလွန်အရေးကြီးသည်။နိုင်ငံတစ်နိုင်ငံတွင်ကားမရှိမဖြစ်လိုအပ်ပါသည်။အထူးသဖြင့်ဖွံ့ဖြိုးဆဲ၊တည်ဆောက်ဆဲလူ့အဖွဲ့အစည်း၊လူမျိုးတစ်မျိုးတွင်ပို၍လိုအပ်ပါသည်။ကျွန်တော်ရို့ရခိုင်တွင်လည်းဝေဖန်ထောက်ပြတတ်သောအကျင့်၊ဝေဖန်ခံနိုင်သောအကျင့်များကိုမွေးမြူကတ်ရပါမည်။
      ရခိုင်တို့သည်အမျိုးသီလနှစ်ဌာနကိုချစ်သည်ကိုယုံမှားသံသယမရှိပါ။ယင်းအတူမိမိလူမျိုး၊မိမိနိုင်ငံကိုတိုးတက်စီလိုသော၊မသာမာမှု၊လာဘ်စားမှု၊ဘက်လိုက်မှုကင်းသောလူ့အဖွဲ့အစည်းကိုထူထောင်စီလိုသောဆန္ဒရှိသည်ကိုလည်းယုံမှားသံသယမရှိပါ။ယင်းကြောင့်လူတစ်ဦးချင်းဖြစ်စီ၊ဌာနတစ်ခုချင်းဖြစ်စီ၊ပါတီတစ်ခုချင်းဖြစ်စီမျိုးချစ်စိတ်ဖြင့်ဝေဖန်ထောက်ပြနိုင်ကတ်ပါစီလို့ဆန္ဒပြုယင်း.....။          ။
                              အဘာသား