သက်ရောက်မှု(ဝတ္ထုတို)

               ကုလားထိုင်တစ်လုံးကိုပြီးအောင်လုပ်ရစော်လေ့ မလွယ်။သစ်တိပိုင်းရစွာတစ်မျိုး၊ ရပေါ်တိုက်ရစော်တစ်ဖုံနဲ့ တစ်ရက်လုံးလုပ်ရဖို့ယာချင့်။ တစ်ရက်လောက်လုပ်မှ ကုလား ထိုင်တစ်လုံးပြီးဖို့။ လက်သမားလောကမှာပြောကတ်ပိုင် ဆောက်တိုခါးကုန်း၊မယားမုန်းဆိုစွာ အမှန်တကယ်ရာ။ သစ်တိ ကဈီးကြီး၊ သံမှိုတိကခက်၊ လုပ်ရစော်ကပင်ပန်းရရေကြားထဲ ကုလားထိုင်တစ်လုံးရောင်းခီမှ ၄ထောင် ၅ထောင်။ တစ်မိသား စုတစ်ရက်စာ စားဖို့အနိုင်နိင်။ သူများလက်သမားတိပိုင် အိမ် ဆောက်၊တိုက်ဆောက်ဖို့လေ့မတတ်။ တစ်နိုင်တစ်ပိုင် အိမ်ပရိဘောဂ လုပ်ရစော်က လက်သမားမဟုတ်၊ မျောက်မ ဟုတ်ဆိုကေရယင့်။ ဟူး......ဘဝကပီးလာရေအတိုင်း ရှင် သန်ရဖို့ဗျယ်ယေ။
                "အဖသေ.....အဖသေ....ဇာစိုင်းစားနီလေ.."
                "အင်း.....မစိုင်းစား"
                 "အဖသေကို ဝမ်းသာစရာတစ်ခုပြောကဖို့သိမ့်"
            ကျွန်တော့်အိမ်ရှင်မက ဝမ်းသာရေမျက်နှာနဲ့ ပြော လာရေ။ မျက်လုံးတိကတောက်ပလို့။ မှိုရရေမျက်နှာမျိုးနဲ့။ ပြုံး သိပြုံးသွင်။
                "ဇာလဲ..ဟေ"
                 "အေမာ...ဈီးက ဖဲသာအိတ်တစ်အိတ် ကောက် ရခရေ။ ဖဲသာလေ့ ၇ထောင်(၇၀၀၀)တောင်ပါရေ အဖသေ"
                  "ယော်....ပိုင်ရှင်ကိုမရှာခလားယကေ"
            ကျွန်တော်က သိချင်ရေစိတ်နဲ့ ပြန်မိန်းကြည့်မိရေ။ ကျွန်တော့်အိမ်ရှင်မက...
                   "ဘေးပတ်ဝန်းကျင်တော့ခါကြည့်ခယင့်။ တစ် ယောက်လေ့ရှာနီစော်ကို မတွိကာ။ယကေယူခယာမနင်း။ တစ်ရက်အတွက်ပိုင်ရေမနင်းယေ..."
                    "ဟူး....နင်ကလေ့ဟေ....လူများဖဲသာနဲ့။ ထားလိုက်ဟုန့်သိမ့်။ ပိုင်ရှင်ပေါ်လာကေ ပီးလိုက်လို့ရအောင်"
                    "အဖသေကလေ့ ရူးရေဟန်။ ဈီးကရခစော် အိမ်မှာထားလို့ရဖို့သိမ့်လား။ သုံးပစ်လိုက်ဖို့ယာ။ ဒေမာဆိုင် မှာခေါင်းမလျှော်ရစော်ရစွာတောင်ကြာယာ။ ထမင်းစားပြီးကေ ခေါင်းလျှော်ဖို့လားဖို့။ အဖသေအိမ်စောင့်ကျန်လိုက်.."
               ကျွန်တော့်အိမ်ရှင်မက မာန်ပါရေလိုလို၊ အားမလို အားမရလိုလိုနဲ့ သူ့စိတ်ကူးတိကိုပြောပြီးကေ ကျွန်တော်အလုပ် လုပ်နီစော်နားက ထလားခရေ။
                 အော်...လူဆိုစွာလေ့ အလကားရကေ ဇာဖြစ် ဖြစ်လိုချင်စွာမျိုးလား။ ဟုတ်ဖို့တော့ခါမထင်။ ယကေလေ့ ကိုယ့်အတွက် ကောင်းကျိုး၊ကိုယ့်အတွက် သာဖို့ကိစ္စဆိုကေ လိုချင်ကတ်ရေမျိုး။ ကိုယ့်ဘက်ကရှုံးဖို့၊ နာဖို့ဆိုကေ မျက်နှာ မလှည့်ချင်ကတ်။ အေဟင့်သည်ပင် လူ့သဘာဝ၊ လူ့စိတ်၏ပုံ သေနည်းရာဟိဖို့။ အော်....လူ.....လူ.....။
.....................................................................
(၂)
       
            ရမ်းပေါက်လီပေါက်လာဗျယ်။ အဂုမှ အအီးစကေရ ရေ။ဒေပိုင်ကဆုန်လမှာက ကကောင်းအပူဒဏ်ကိုခံရရေ။ ညနီ စောင်းရမ်းပေါက်လီတိုက်မှ အအီးတဖဲ့ချေရကတ်စော်။ ကျွန် တော်လေ့ ဒေပိုင်တန်းခူး၊ ကဆုန်လတိမှာဆိုကေ နိခင်းဖက် ကောင်းအလုပ်မလုပ်ဖြစ်။ ချွေးတိက မတရားထွက်တေ။ယင်း အတွက်နဲ့ ညနီစောင်းရမ်းပေါက်လီ လာမှရာ အလုပ်ကိုစလုပ် ဖြစ်တေ။ မိုးထဖက်ချောထားရေသစ်တို၊သစ်စတိကို လိုအပ် တေပိုင်ဖြစ်အောင် လုပ်ရဖို့သိမ့်။
             လက်သမားဆိုစော်လေ့ တူသံကြားမှထမင်းဝရေ ဆိုမနင်း။ ထိုင်နီလို့ကတော့ခါ ပါးစ စွတ်ဖို့မဟုတ်။ လက်လှုပ် မှ ပါးစ စွတ်ဖို့။ ကျွန်တော်ရေ သစ်တိကို လိုအပ်တေပိုင်ရ အောင် လွှတစ်စင်းနဲ့ လုပ်နီမိရေ။
                  "အော....အဖသေ၊ အဖသေ...."
               ကျွန်တော့်အိမ်ရှင်မ ခေါ်သံတိက အလန့်တကြား ။ဇာမသေလေချင့်....
                     "ဇာလဲ...ဟေ"
                     "တစ်ခေါက်ပါလတ်ချက်...အယင်"
                ကျွန်တော် လုပ်လက်စလွှကိုအသာချပနာ အိမ်ရှင် မရှိရာအိမ်ထက်ကိုတက်ပါလတ်တေ။ အိမ်ထက်မှာတော့ခါ ရှုပ်ပွနီယင့်....။
                      "ဇာဖြစ်လေ..ဟေး..အားလုံးကြင်းနီကာ" ကျွန်တော်အံ့သြစိတ်နဲ့မိန်းမိရေ။
                    "ဇာမှာလေ အဖသေ...နားဒေါင်းတစ်ဖက် ပျောက်လားခယာ။အဖသေမမြင်မိလား..."
                 ကျွန်တော့်အိမ်ရှင်မ မျက်နှာတိက ရွာချဖို့ပျင်နီ ရေ မိုးရိပ်ခဲတိပိုင်။ မျက်လုံးတိက ဆောက်တည်ရာမရ။
                     "မမြင်လိုက်ကာ...အမိသေမှာ ဝတ်ထားရေ မနင်း"
                     "အေ...ဝတ်ထားရေ။မိုးထကသိမ့်ရှိရေ။ ဝက်အူချောင်နီလို့တောင် မကြာမကြာစမ်းနီစော်ချင့်"
                    "အမိသေမှာ ဇာမာကျကျန်ခကမသိ"
                    "အေ..ရှာပီးပလင်တစ်ချက်။ရပ်ကြည့်နီကာ"
            ဒေါသသံတိပါလာဗျယ်။ကျွန်တော့်ဖက်ကို အပူပတ် ပါလတ်ဖို့ချင့်။ ရှာကြည့်ရဖို့ချက်။ ကျွန်တော်  ဟိုနားတစ်ချက်၊ ဒေနားတစ်ချက် ရှာကြည့်မိရေ။ မရ။ ကျွန်တော့်အိမ်ရှင်မ တော့ခါ အိပ်ယာတိ၊ဂေါင်းအုံးတိ၊ ခြင်ထောင်တိပါမကျန် ရှာလီ ယင့်။
            အော်...ကျွန်တော့်အိမ်ရှင်မလေ့ စိတ်မကောင်းဖြစ် ဖို့၊ နှမြောဖို့နမ်းရာ။ ကျွန်တော်နဲ့ရရေလောက်ကပင် တစ်ခုလေ့ ဝယ်ထည့်ပီးနိုင်စော်ကမဟုတ်။ သူ့အမိ အဖရို့ဘက်ကပီးလို့ ဝတ်နီရစော်။ သူ့ခမျာလေ့ သနားဖို့ကောင်းရေ။
           ယာ...ငိုနီယာ။ ဟူး.....မမဆိုစွာလေ့ တေ့ကျကေ ငိုဖို့တတ်လာမသိယာ။ ကျွန်တော် အသာချေ အိမ်ရှင်မနားကို တိုးလိုက်တေ။
                "မငိုကေ့ဟေ...ပျောက်ဖို့ကံပါလို့ ပျောက်စွာလို့ မှတ်လိုက်ဖိ။ အမိသေလေ့ ဟိုလား၊ဒေလား၊ လားပစ်ခီယာ။ ဇာမှာကျကျန်ခကမသိ။ စ်ီးမွာက်က်န္ခလာ။ မဟုတ်ကေ ခေါင်းလျှော်ရေဆိုင်မှာယက် ကျကျန်ခရေဟန်။ ထားဖိ ထားဖိ။ ငါ နောက်တစ်ခု ဝယ်နိုင်အောင်ကြိုးစားမယ်.."
            ကျွန်တော်က စိတ်သက်သာရာ ရလိုရငြား ပြောလိုက်တေ။ အိမ်ရှင်မက ကျွန်တော့်ဖက်ကိုလှည့်လာပြီး ကေ မျက်စောင်းတဝင်းဝင်းနဲ့...
                 "ရဖို့ယေ...အဖသေပိုင်လုပ်နီလို့။ မေမေရို့ ဘာဘာရို့ဘက်က ပီးထားလို့ဝတ်ရစော်ကိုတစ်ခါ။ အမှတ်တရ လေ့ဖြစ်တေချင့်။ အဘာလေ...မပြောချင်ယာ..ဟီး...အီး.."
            စကားပြောယင်း ငိုသံတိကပါလာရေ
                 "ငိုမနီကေ့လေ့ဟေ..အချေလာ"
             ကျွန်တော့်နည်းနည်း စိတ်ဆတ်ပါလတ်တေ။ ဟူး..သူရို့ဗျယ်ခံစား။ဇာပိုင်စော်တိလဲ။ကျွန်တော့်စိတ်ထဲမှာ အိမ်ရှင် မကို စကေအလိုမကျချင်။
                 "အိုး...အရှင်မ....အရှင်မ..အကျွန့်နဒေါင်းကို ကောက်ရလို့ ပြန်မပီးပါက ဖီးကြီးသင့်ပါလီ၊ မိုးကြိုးပစ်ပါလီ၊ မြေကြီ.."
                   "ဟေး...ဟေး..တန့်ဖိကား..."
             သူ့စကားမဆုံးခင် ကျွန်တော့်အသံက ဟိန်းလို့ ထွက်ပါလားရေ။ ဇာဟင့်တိလဲ။စိတ်ထဲမှာလေ့ ကသိက အောက်ဖြစ်လားမိရေ။
                  "ဇာပိုင်လဲဟေ...မိုးထကဖဲသာအိတ်ကောက် ရလို့ ငါကပြန်ပီးဖို့ပြောခါ မရဗျယ်ဆို။အဂုလေ့အမိသေစော် မရဗျယ်။ အမိသေမှာပျောက်စော် ဇာမှာမှန်းမသိ။ အိမ်မှာရှာ လို့ရဖို့လား။ မိုးထက ဖဲသာပျောက်တေလူလေ့ အမိသေပိုင် ကျိန်လီဖို့ယေ။ ယင်းအတွက်နဲ့ အမိသေ ကျိန်စာကျစော်ချင့်"
             ကျွန်တော့်စကားတိက ဇာကိုရောက်လားလဲ ကျွန် တော်မသိ။ ကျွန်တော်ကနှစ်သိမ့်ဖို့၊ စိတ်ပြေအောင်ပြောဖို့ လေ့မတတ်။ ကျွန်တော်ပြောချင်စော်ကို ကောက်ပြောလိုက် စော်ရာ။
             ယေကေလေ့ အမိသေ အသံ...တိတ်လားခရေ။
            သူ့မျက်လုံးတိက ရီဝေဝေနဲ့ တစ်ခုခုကိုအလေးအ နက်စိုင်းစားနီသယောင်ယောင်။ ဇာလဲလို့ကျွန်တော် မပြော တတ်ပါ။ အော်....သူ့နားဒေါင်းကို နှမြောနီစော်လာ။ ကျွန် တော်ပြောလိုက်လို့ မာန်ပါလားခစော်လာ...။ ဇာချင့်လဲဆိုစော် ကျွန်တော် မသိလိုက်ပါဗျယ်။ အော်...လူ....လူ....။
                           (အဘာသား)