မြားဖြှောင့်တစ်စင်း

         ၂၀၁၃ခုနှစ်၊ဖေဖော်ဝါရီလကထွက်တေ ရခိုင်မဂ္ဂဇင်း အမှတ်(၃၄)မှာ ဆရာနောင်အေးရွီးရေ ကဗျာနှစ်ပုဒ် ဆောင်းပါး ကိုဖတ်လိုက်ရပါရေ။ ဆောင်းပါးမှာ ၂၀၁၁ခုနှစ်ထွက်တေ ဒွါရာ ဝတီမဂ္ဂဇင်းအမှတ်(၃)မှာပါရေ ကဗျာနှစ်ပုဒ်ကိုကောက် ကြောင်းဆွဲထားစော်ဖြစ်ပါရေ။ အဓိပ္ပယ်ဖွင့်ဆိုချက်တိနဲ့ အဓိ ကပစ်မှတ်ထားပြီးကေရှင်းပြလားစွာက ကဗျာသျှင် အဘာသား ရွီးရေ "အိပ်မက်" ဆိုရေကဗျာကိုဖြစ်ပါရေ။
         အိပ်မက်ဆိုရေကဗျာကို ဆရာနောင်အေးအသေးစိတ်ပုံ ဖော်ထားစော်က ကဗျာသျှင်အဘာသားရွီးထားရေ အဓိပ္ပယ် ထက်ပင်ပြီးပြည့်စုံစီပါရေ။ကဗျာသျှင်အဘာသားက သူ့ကဗျာ ကိုနိမိတ်ပြစကားလုံးတိနဲ့ဖွဲ့ဆိုထားပါရေ။ ပြန်လို့တစ်ခေါက် ခံစားကြည့်ကတ်ပါမယ်။
                "အိပ်မက်"
ဝေလီဝေလင်း
မိုးမလင်းတလင်းမှာ
ခွီးအူသံတိနဲ့ငိုက်နီရရေဘဝ။
ပလွီသံမကြား စည်သံမကြားဘဲ
ကိုယ့်အသားကိုယ်စားပနာ
မြက်တောကရာဆုတောင်းလို့
ဇာကြောင့်မသိဘဲနဲ့
လောပြောင်ပြောင်ကျိတ်
မျက်စိကိုမှိတ်နားကိုပိတ်ဗျာ
အိပ်မရရေကြားထဲ
အကွန်ဆောင်ရစွာကခက်ယင့်...။ ကဗျာသျှင်အဘာသားနဲ့ ဆရာနောင်းအေးရို့ရေ ကဗျာ၏ဒေလောက်အထိ ခံစားမှုတတူ ပါ။ဆရာနောင်အေးကလေ့သင့် ကဗျာသျှင်နဲ့ခံစားမှု ၁၀၀ရာခိုင် နှုန်းထပ်တူကျရေလို့ဆိုထားပါရေ။
          ထားပါဖိ။တတူကျကေကောင်းပါဗျယ်။ကဗျာသျှင်လေ့ တတူကျရေလို့ဆိုပါဖို့။ခံစားမှုမတူဆိုဆို ဆရာနောင်အေးက တော့ခါ ကဗျာသျှင်ပစ်မှတ်လွဲလားခပါဗျယ်ကာလို့တအံ့တ သြဖြစ်လားခရေစာသားတိက
"တစ်ခါလာလေ့ထိန်းသိမ်း
တစ်ခါလာလေ့စောင့်ရှောက်
တစ်ခါလာလေ့တန်ဖိုးထားဆိုလို့
လားမရရေတန်းထားကို
ဖြတ်တောင်မလျှောက်ဝံ့စော် အိပ်မက်...။"ဆိုရေစာပိုဒ်ဖြစ်ပါ ရေ။ဒေနီရာမှာဆရာနောင်အေးကဆိုထားပါရေ။ ကဗျာသျှင် ပစ်ရဖို့စော်က ရန်သူရှိရေဘက်အရှိဘက်ကိုပါ။အဂုက ကဗျာသျှင်စွာ သားချင်းတိရှိရာ အနောက်ဘက်ကိုတည့်တည့် ပစ်ခွင်းလိုက်ပါဗျယ်ကာ ပါလတ်။
        ကဗျာသျှင်ရေကဗျာပထမပိုဒ်၊ဒုတိယပိုဒ်ရို့မှာ ပစ်မှတ် ထားပြောနီစော်က ဟိုး..အရှိဘက်ကိုပါ။ဆရာနောင်အေးပြော ရေပိုင်ရန်သူရှိရာအရှိဘက်ပါ။ ကဗျာတတိယပိုဒ်မှာရာရန်သူက အနောက်ဖက်ကိုရောက်လီပါဖီု့လား။တတိယပိုဒ်ပါ၊စတုတ္ထပိုဒ်ပါပစ်မှတ်ကတစ်ခုတည်းပါရာ။
        ကျွန်တော်ရို့ခံစားကြည့်ကတ်ပါမေ။တစ်မျိုးသားလုံးစိတ် ဓာတ်နှင့်အကျင့်စာရိတ္တမြင့်မားရေး၊အမျိုးဂုဏ်ဇာတိဂုဏ်မြင့် မားရေးနှင့်ယဉ်ကျေးမှုအမွေအနှစ်များ၊အမျိုးသားရေးလက္ခဏာ များမပျောက်ပျက်အောင်ထိန်းသိမ်းစောင့်ရှောက်ရေး၊စစ်မှန် သောမျိုးချစ်စိတ်စာတ်ဖြစ်သည့်ပြည်ထောက်စုစိတ်ဓာတ် ရှင် သန်ထက်မြက်ရေး၊တစ်မျိုးသားလုံးကျမ်းမာကြံ့ခိုင်ရေးနှင့်ပညာ ရည်မြင့်မားရေးလတ်။ဇာသူရို့အော်နီကတ်ပါလေ။အော်နီရေလူ တိကအမှန်တကယ်စေတနာနဲ့လား။ဖွင့်လိုက်တိုင်း၊ကြားလိုက် တိုင်း၊နေရာတိုင်း၊အချိန်တိုင်းအော်သံကကြားရမြဲ။ကြားရတိုင်း ကြားရတိုင်းလည်းရင်နာမြဲပါ။
           ပါးစပ်ကပျား၊ဝမ်းမှာမျှားရှိရေလူတိ။တကယ့်တကယ် ကကျွန်တော်ရို့မှာအမျိုးသားလက္ခဏာက ပေါက်ဆိန်ကိုင်ထင်း ခွတ်နီရလို့ဇာတိဂုဏ်တိရှာမရယာ။ဇာကိုတန်ဖိုးထားရမှန်မသိ အောင်၊ဇာကိုမြင့်မားအောင်လုပ်ရဖို့လဲမသိအောင်ဖြစ်လားခရ စော်ကျွန်တော်ရို့ပါ။သမိုင်းစာမျက်နှာမှာမုသားဝါဒကံတိကျိုးနီ စော်ဇာခါဆက်ကတ်ပါဖို့လဲ။ဖြတ်လျှောက်ဖို့တောင်အားမရှိပါ ဗျယ်။
          ဇာမှာလေစစ်မှန်ရေပြည်ထောင်စုစိတ်ဓာတ်။တစ်ခါ လာလေ့မဲပြာပုဆိုး၊တစ်ခါလာလေ့မိုးခါးရေနဲ့သောက်ပလိုက် စွာ၊ဝတ်ပလိုက်စွာခုထိ၊ခုထိပါ။ဇာတ်မှာကပြရေပိုင် မင်းသား လေ့သူ၊လူဆိုးလေ့သူ၊ဘုရင်လေ့သူ၊သုဘရာဇာလေ့သူဗျယ်။ ထပ်ဗျယ်ထပ်ဗျယ်စီထားရေစာကြောင်းကဖတ်မကောင်းပါ ဗျယ်။ယေကေလေ့ ကျွန်တော်ရို့အလွတ်ကျက်မှတ်ရတုန်းသိ။
            ထားပါဖိ။ရင်နာစရာတိကိုမျိုသိပ်ထားလိုက်ပါမေ။ ကဗျာသျှင် အဘာသားနဲ့ဆရာနောင်အေးရို့ရေတစ်ယောက်က ပဲ့ကိုင်တစ်ယောက်ကလှော်ခတ်ရဖို့လူတိပါရာ။ ပဲ့ကိုင်ရှင် လမ်းပြပီးမှလှော်ခတ်သူရို့လိုရာရောက်ကတ်ဖို့စော်ပါ။ ပြောချင် စော်က ကဗျာတစ်ပုဒ်ကိုဖတ်ပြီးကေ သဘောထားကွဲလွဲနိုင်ပါ ရေ။ခံစားမှုမတူစော်ကိုအပြစ်ဖို့လို့မရပါ။ယကေလေ့ကျွန်တော် ရို့အတူတူခရီးဆက်လို့ရပါရေ။ကဗျာ၏နောက်ဆုံးအပိုဒ်ကို ဆက်ကတ်ပါမေ။
"၄င်း..၄င်းနဲ့
၎င်းဆယ်ခါထပ်ဗျာစီထားရေစာကြောင်း
ဖတ်မကောင်ူဘဲကျက်ပလိုက်စွာ အိပ်မက်။
ဝေလီဝေလင်းအိပ်မက်
မိုးမလင်းတလင်းအိပ်မက်
ဖမ်းဆုပ်လို့မရရေအိပ်မက်
အိပ်မက်....အိပ်မက်...။   ။
                         အဘာသား
        အဘာသား ဆိုရေကလောင်သျှင်စော်ဆရာနောင်အေး ပြောပိုင်လူငယ်တစ်ယောက်ပါ။ ဆရာနောင်အေးကိုလေ့ကျေး ဇူးတင်ပါရေ။သမီးချေတစ်ယောက်ပိုင်ချစ်လို့ပါ။အမှန်ကဆရာ နဲ့ကဗျာသျှင်ရို့ရေ အတူတူစီးရေရီကြောင်းတစ်ခုပိုင်ပါရာ။ဆရာ ရို့နဲ့အတူစီးမျောနီရေ ရီမှုန်ချေတစ်စက်ပါ။ကဗျာသျှင်က ကဗျာမှာသရော်သံချေနဲ့ကောက်ချက်ချထားစွာက ဝေလီဝေ လင်းအိပ်မက်၊မိုးမလင်းတလင်းအိပ်မက်၊ဖမ်းဆုပ်လို့မရရေ အိပ်မက်ပါလတ်။ဝေလီဝေလင်းမိုးမလင်းတလင်းမှာမက်တေအိပ်မက်ပါ။အမှန်တကယ်လေ့အိပ်နီစော်မဟုတ်။မအိပ်စော် လေ့မဟုတ်။ကြက်အိပ်ကြက်နိုးဆိုပိုင်၊သိတစ်ချက်မသိတစ် ချက်နဲ့ပါ။ဇာတစ်ခုလေ့ဖမ်းဆုပ်ကိုင်လို့မရရေအရာတိပါ။နိုး ယောင်ယောင်မနိုးယောင်ယောင်နဲ့ဖြစ်နီရေကျွန်တော်ရို့ဘဝတိ ပါ။
           ကျွန်တော်ရို့ဇာအချိန်ထိမက်ရပါဖို့လဲ။အကွန်လေ့ ဆောင်မနီချင်ပါဗျယ်။ဖမ်းဆုပ်လို့တစ်ခုခုကိုရချင်ပါဗျယ်။ကဗျာ ထဲမှာပါရေပိုင် ....အိပ်မက်...အိပ်မက်...လို့မညဉ်းတွားချင် ပါဗျယ်။ဒေလောက်ရာပြောကတ်ပါမေ။
          ဇာပိုင်ပင်ဆိုဆို ကျွန်တော်ရို့အတူတူလက်ချင်းဆက် လို့ခရီးလျှောက်ကတ်ပါမေလို့ဆန္ဒပြုယင်း..။   ။
                                         အဘာသား